احنا وشركة الكهرباء .. عِشرة عُمر
قبل كل حاجة بدي أهني نفسي :)
اليوم 1 فبراير يوم ميلادي ^_^ صار عمري 17 سنة والحمد لله
واليوم كمان استلمنا الشهادات ومعدلي منيح ومش منيح بالتسعينات والحمد لله لكن تمنيت أكثر من هيك !
نبدأ بقصتنا الحزينة ؟ ?
اخ اخ اخ .. شو نكتب وعن شو نحكي .؟؟ في مثل بتقولو ستي : " اللي استحوا ماتوا " اه والله اللي استحوا ماتوا وعنا هيك الحال ما ظل حدا بيستحي من حكومتين غزة والضفة وكمان حبايبنا في شركة الكهربا ، اللي احنا لليوم مش عارفين هي تابعة لغزة ولا للضفة ولا قطاع خاص ولا لمستثمرين ! على أية حال هي شركة ذات حدين .. الحد الأول لمص دم الشعب وكل يوم وهم جايين بدهم فلوس ومعهم جيب شرطة ، والحد الثاني حد سكينة الكهربا اللي شبعت وهي كل يوم انزل واطلع .
الجدول :
الكهربا بتيجي عنا بغزة 8 ساعت بنهار اليوم الأول و8 ساعات بنهار اليوم الثاني واليوم الثالث طول اليوم J لكن الوقت اللي بتكون جاية فيه الكهربا لازم لازم لازم يقطعوها ويجيبوها ع الأقل 5 مرات يعني لازم كل يوم ناس تخرب عندهم أجهزة كهربائية .
شو سبب انقطاع الكهربا ؟
هذا السؤال صارلنا سنواااات بنسأل عنو وللأسف ما في إجابة تبل الرّيق يعني لما يعملوا مقابلة مع مسؤل من الشركة ويسألوه عن السبب بيقول : الاحتلال يمنع ويمنع ويشدد حصاره ، ولما نسأل قيادي في حكومة غزة ؟ بيقول : سلطة رام الله محتكرة الأموال وبتعمل على قطع الكهربا عن غزة ، ولما نسأل المواطن بيقول : يارب ينزل صاروخ ع محطة التوليد ونرتاح ^^ وهذا هو الحل الوحيد .
سؤال بدو جواب ؟
طيب بما انو قصة الكهربا صعبة والمولدات ما بتقدر تغطي غزة كلها " وكأنوا غزة قارة " ليش أيام امتحانات توجيهي ما قطعت الكهربا إطلاقاً ..؟ ؟ طيب بلاش ! ليش أيام صفقة الأسرى ما قطعت الكهربا لمدة أسبوع ؟ ؟ يعني بنقدر نجيب الكهربا !؟؟ لكن ما بدهم ؟ لعبة سياسية قذرة .
أكثر الأدعية ع لسان المواطن ؟
حسبي الله عليهم
الله ينتقم منهم
يارب يجي صاروخ اف 16 أشول
يلعن أبو الكهربا ع اليوم اللي شفناه فيها
هذا عنوان الهاشتاق الخاص ع تويتر لقصة الكهربا بغزة وبدي أقتبس منو بعض التغريدات :
- الكهربا جاية هلقيت عنا :D
- لما كهرباء تيجي يومين بدون قطع كمان بتكون في أزمة في التفكير وقتيش راح تقطع ؟!
- والله يا استاذ خالد الغزازوة فش اكرم منهم والله مستعد يستقبلك على الشمعة .
- اكثر اشي بيغيظك لما حكومة رام الله تقرر تطوير شبكة الكهربا .. طيب جيبوا الكهربا الأول وبعدين طوروها
- شو ممكن نحكي عن كهرباء غزة?
- حياتنا تنشل في لحظة عتمة.
- وبعدين مع صوت المواتير بالحارة والله صدّعنا.؟؟
الاشتراك في:
تعليقات الرسالة
(
Atom
)
25 تعليق على احنا وشركة الكهرباء .. عِشرة عُمر
اولا ياسر "يعطيك العافية"..
تانيا"كل عام وانت بخير"
تالتا للحكومتين "ماأسخم من سيدي الا ستي"..وعلى ذكر ستي بدي أدعي دعوتها: "الله يقطع ايدو اللي بيقطع الكهربا"..
موووووفق
بسم الله الرحمن الرحيم ....
السلام عليكم ورحمة الله وبركاته......
اهنئك على دخول 17 سنه وعلى النسبه الحلوه يارب تاخذ احسن منها بالسنين القادمه
اخي ياسر..هي فعلا مأساه ..اسال الله ان يصبركم ..الكهرب نعمه عظيمه لم اكن اشعر بقدرها إلا عندما قرأت معاناتكم ...لم اشعر بفقدها في حياتي الحمد لله ..ولم اتخيل ذلك ..ولكن فقدكم لهذه النعمه يجعلني استشعر مرارة مايعانيه العديد من الفلسطينين ..دوما ما اشعر بمرارة مايعانيه الفلسطينيون ..من ألم وظلم وقهر ..ولكن لم اتوقع ان يصل الظلم والحرمان الى ان يستخدم هؤلاء الحمقى طريقه غبيه للتعبير عن قسوتهم ...أسأل الله ان يعوضكم ويعجل لكم بفتح قريب ونصر عاجل ..ويفضح الخونه المندسين بينكم ..فهم سبب عدم تحرر فلسطين الى الان ..وبقاء الاضطهاد والاحتلاال..آميييييين ..
شكرا كلام رائع
اهلا بك شيماء..
الله يعافيكي يارب
وانتي بألف خير ..:)
اه والله ما اسخم من سيدي الا ستي :) الله يعدمنا اياهمشركة الكهربا قولوا آمين ..
شكرا لتواجدك شيماء .
وعليكم السلام اخت شوق .
شكرا للتهنئة :)
هكذا هي الحياة بغزة عزيزتي ... وهكذا هو حكم الطاغية وحكم الاحتلال ، أتمني منك ان تعملي جاهدة على توصيل معاناة الشعب الفلسطيني الي من حولك والعاالم أجمع .
شكرا لك ولتواجدك .
العفو عثمان .
كن بالجوار دوماً .
يردون ترباية الشعب عن لسان مدير شركة توزيع الكهرباء قطاع غزة
حسبي ربي عليهم من كل ام وهي بتلبس ولادها على العتمة ليروحو على المدارس ودعوة مصلي في صلاة الفجر يخرج من المسجد في الظلام الحالك نعلو كل فردة شكل اتفووووووووووووو على شركة الكهرباء وموظفيها منافقين خون عملاء
ان شاء الله مشكلة الكهرباء راح تنحل انضمة فلسطين لمجموعة الدول الثمانية للطاقة الكهربائة مع انو انضمام فلسطين كان في 2008 لكن هم الأن في نهاية شبك فلسطين
والله قصة الكهرب فقعتنا
الواحد عيشتو قرفها من ورا الكهرباء!!!
ان شاء الله تنحل كمان 2030
هههههههه شر البلية ما يضحك
في نكتة بصدد الموضوع
هادا بيقلك واحد دخل الجنة ومعاه ملاك بيدله على ملكه فكان الزلمةبيطلع ع شجر الجنة فكل شوية بتقع ورقة فقال للملك لشو بتقع هاي ، قال كل ما واحد يكفر لواحد بتقع ورقة ، وهما ماشيين فجأة وقع كوودا قاوم ورق قلو شو هادا قال لالالا ولا اشي بس الكهربا قطعت بغزة
هههه
ههههههههههههه
موضوع كان ولا بد من كتابته والتكلم عنه
سلمت يداك على هدا الموضوع اخ ياسر
بنتمنى حل مشكلة الكهرباء باسرع وقت
سلامٌ عليكْ:
ستحل المشكلة عما قريب" دائماً هذا الكلام على لسان المتحدث باسم الشركة"
كل ما اشتدت بتنفرج زي ما بيقولوا...
ياريت يا عمر .. لكن مش متأمل فيها خير والله !..
مشكور للمرور يا صديق
ههههههههههه وابصر تنحل ب 2050 كمان ^_^
بتهون يا اخي ..
ههههههههههههههههههههههه بتهون اخي ولسا ما شفنا اشي ^6
نأمل ذلك ان تفرج اخت فداء ..
شركة الكهربا .. حسبي الله عليهم
الكل لازم ينتفض بيكفى بهدلة ومهازل مع شركة قطع الكهرباء
طول ما احنا ساكتين وشركة قطع الكهرباء و مستوردين المواتير راح ايضلوا يلعبوا بحياتنا .
موضوع تافه
اخ ومين يسمعك ؟
شكرا لك أخي الكريمة .. أكيد انت مستفيد من قطعة الكهربا
ههههه
عنجد شر البلية ما يضحك
من وجهة نظرى بما انو الحكومة عنا مش قادرة تلبى
الاحتياجات الاساسية للشعب
ليش ضايلة لحتى الآان فى الحكم ؟ تتنازل و القادر هو اللى يحكم
يا اما خلينا نحكم نفسنا بنفسنا :D
ياااااه !
مين يسمعك ومين يقنع الحكومة :)
صرنا متعودين يا ست لارا .. الله المستعان
هههه ..
والله شر البلية ما يضحك ،
(ياكهربا انسيتينا .. زمان ما جيتينا .. )
http://www.youtube.com/watch?v=gwGlVoUHf0A
اتفرج واسمع يا عزيزي .. واكيد بتعرفوها
وهل يخفى القمر يا عبود :)
ابوي عندكم ههههههه
إرسال تعليق