يا موج وصل للخليل سلامي | بالعامية الفلسطينية

06 أبريل 2014
خريطة توضح المسافة بين جباليا والخليل ، تصميم أمير عنان

السلام عليكم عمّــي ...!

هالتدونية حتكون كلها بالعامية الفلسطينية ، فاللي ما بيطيق العامية يتسهل، واللي بيحب يكمل يا مية هلا ومرحبا.

شو القصة ؟

هالمرة ناوي أكتب عن مدينة فلسطينية روعة في كل المجالات في خيرها وفي تضحيتها لهالوطن المنكوب ، بدي أحكيلكم عن مدينة تربيت ع عشق شوارعها من وأنا صغير ، قبل ما أعرف شو هي وين بتقع ومين سكانها ؟


اسمها مدينة الخليل المحتلة ، ، ، زمان .. في أول أيام الانتفاضة الثانية كانوا أهلي يتابعوا أخبار الانتفاضة ع تلفزيون أرضي محلي اسمو "تلفزيون الأمل" أصلن مكنش غيرو هو واكم من قناة بس ، هالتلفزيون دايمًا كان يجيب إعلانات لمحلات تجارية موجودة في شارع اسمو "عين سارة" بالخليل ، وكل مرة تتكرر الدعاية وتقول " الخليل .. شارع عين سارة .. مقابل فلان الفلاني " كثير كان نفسي أزور هالمكان لسببين .. أول اشي اني كان نفسي بكثير شغلات من اللي بتنعرض بهالإعلانات ، وثاني اشي إنو اسم الشارع كان غريب وكان نفسي أعرف ليش سموه هيك "عين سارة" وخطر ع بالي كثير أسباب بتفكير طفل غلبان ولسا مشافش من الدنيا اشي مثلا إنو في بنت اسمها سارة وقعت عينها بالشارع هذا فحزنوا عليها وسموه عين سارة ..!

كبرت شوي

صرت لما أروح أشتري من الدكانة لبن أو شمينت إمي توصيني أقول للبياع يعطيني لبن خليلي من "الجنيدي" لإنو كان ولسا ضايل لليوم هو الأزكى والأنظف والأفخم ، ولما دخلت المدرسة صرت أروح ع المكتبة أشتري دفاتر ، البياع يقولي : هذا دفتر "الحصان الأبيض" الأصلي وأنظف نوع و"خليلي" يعني من الخليل ، ولما أروح ع السوق أسمع كل بياعين الفواكه بيزعقوا " خليلي يا عنب " وبياع ثاني مشغل أغنية " الشهد في عنب الخليل " جنب قطوف العنب الحبة منو بتشرح القلب.

ولما أروح أشتري "جزمة" لرجلي البياع يصير يكرر في جملة "هذي البضاعة من الخليل" عشان يقنعني أشتريها وأرضى فيها لأنو اكتشفت بعدين إنو الخليل مدينة "عصب" الصناعة الفلسطينية .

أحلى نكت كنت أسمعها بحياتي بتكون ع لسان أهل الخليل ، يعني في الصناعة أجدع ناس وفي النكت أقوى ناس وفي العُنب – بضم العين – ع قولة الغزازوة .. طيب لسا في كمان ؟

آه في كمان

مستحيل يوم تفتح الراديو أو تقرأ الجريدة أو تفتح ع النت وما تشوف خبر أو أكثر لجرائم الاحتلال في الخليل إما اعتقالات أو هَـد بيوت أو شهداء أو اقتحامات للحرم الإبراهيمي اللي هو من أعظم المطارح المقدسة في بلدنا المحتلة ، يعني الخليل في الواجهة مع الاحتلال كمان ؟

شو الرابط بين الخليل غزة ؟

في كثير شغلات بتربط الخليل بغزة مثلا الخليل ما بتبعد عن شمال غزة "مخيم جباليا مثلًا " غير56  كيلو متر ، وجبال الخليل بتبين بكل وضوح من أبراج مدينة الشيخ زايد في شمال غزة ، كمان "وادي غزة" بينبع من جبال الخليل ، وأيام ما كان اسمو وادي عنجد كان من أفخم الأماكن بغزة بس لما الاحتلال سرق الميّة اللي بتجري فيه نشف وتحول لمجرى صرف صحي.

’’ في أغنية في ألبوم "زين الملاحم" بتقول : "يا بحر غزة يا عزّة للإسلام ، إحنا تعاهدنا شعبي ما ينضامي ، ويا موج بلغ للخليل سلامي ، باسم الله كانت وصارت العنوانِ" 

جارنا الحج أبو بشير ولّود "الله يمد بعمرو" كان يحكيلنا عن قصص أيام زمان ومرة قال : كنت أطلع الصبح من الكروم بجباليا حامل على ظهري كيس هالبرتقان وأمشي ع رجلي  - مش زيكم حياتكم ع السيارات- أضل كاسحها تأصل الخليل ، أبيع البرتكان هناك وأشتري بنص حقو عِنِب وأضل راجع – مكانش حدود ولا يهود - ، أبو بشير كمان كان يحكيلنا عن النكت الخليلية.

نكتة خلايلية

 بما  إنو صرت حاكي ع النكت مرتين والتدوينة أصلن عن الخليل فمش حلوة أختمها بدون ما أحكي نكتة فاسمعوا ، هذا بيقولك : في اثنين واحد خليلي وواحد نابلسي ركبو بالباص جنب بعض ، النابلسي بيقول للخليلي اللي قاعد جنب الشباك : بردنا من الشباك " يعني سكر الشباك " ، فراح الخليلي قالو : وأنا حمدان من الخليل " افتكر بيعرف على حالو" ، وطبعن هالنكتة ما بتنقص من قيمة أجدع ناس بفلسطين بعد المقدسيين "بنظري طبعًا" أهل الخليل.

خلّصت

بديت التدوينة بجملة " السلام عليكم عمّـي " طبعن بلهجة أهل الخليل الرهيبة ، واللي ما بيعرفها خسر كثير والله ، وبدي أختمها بنفس اللهجة على الله يصحلي زيارة في يوم من هالأيام للبلد اللي حبيتها واللي حبيت أهلها وع راسهم وراسي حبيب قلبي صاحبي "ناصر" ابن الخليل الجدع ، واللي ما بيعرف ناصر .. خسر كثير .. وعليكم السلام ورحمة الله وبركاته عمّـي .. !

روابط

-         وادي غزة
-         بلدية الخليل





4 تعليق على يا موج وصل للخليل سلامي | بالعامية الفلسطينية

إرسال تعليق